Tuesday, April 22, 2008

ബ്ലോഗ്‌ ശില്‍പ്പശാല സംഘടിപ്പിക്കുന്നു.

യുവകലാസാഹിതി ഷാര്‍ജാ യൂണിറ്റിന്റെ ആഭിമുഖ്യത്തില്‍ ബ്ലോഗിംഗ്‌നെ കുറിച്ച് 25-04-2008 ന്‌ വൈകീട്ട്‌ നാലുമണിക്ക്‌ ഷാര്‍ജ സ്റ്റാര്‍ മുസിക്‌ സെന്ററില്‍ വെച്ചു ശില്‍പ്പശാല നടക്കുന്നു. യു. എ. ഇ യിലെ പ്രമുഖ ബ്ലോഗെഴുത്തുകാര്‍ പങ്കെടുക്കുന്നു. യുവകലാസഹിതിയുടെ മുന്‍ സെക്രട്ടറിയായിരുന്ന അക്ബറിന്റെ രണ്ടാം ചരമ വാര്‍ഷികത്തോടനുബന്ധിച്ചാണു പ്രസ്തുത ശില്‍പ്പ്ശാല സംഘടിപ്പിക്കുന്നതു.

ബ്ലോഗിംഗ് എന്ന ഇ-ഡയറി എഴുത്ത് ആധുനികകാലത്തെ ആത്മാവിഷ്ക്കാരത്തിന്റെ ഉപകരണമാണ്. കഴിഞ്ഞ കുറച്ച് കാലമായി മലയാളത്തിലും ഇത് നന്നായി വേരോടിയിരിക്കുന്നു.നമ്മുടെ ഭാഷയെ മരിക്കാതെ നിലനിര്‍ത്തുന്നതില്‍ ബ്ലോഗിംഗ് വരും കാലത്ത് ഒരു നിര്‍ണ്ണായകമായ പങ്കാണ് വഹിക്കാന്‍ പോകുന്നത് എന്നതില്‍ സംശയമില്ല.

എഡിറ്ററില്ലാത്ത പ്രസാധനം അല്ലെങ്കില്‍ എഴുത്തുകാരന്‍ തന്നെ എഡിറ്ററാവുന്ന മഹാസ്വാതന്ത്ര്യം,സിറ്റിസണ്‍ ജേര്‍ണലിസം എന്ന തീക്ഷണമായ പൌരായുധം തുടങ്ങിയവ ബ്ലോഗിംഗിന്റെ സാധ്യതകളില്‍ ചിലതു മാത്രം. രാഷ്ട്രീയപ്രചരണം മുതല്‍ ജീവകാരുണ്യം വരെ ബ്ലോഗിലൂടെ നടത്തപ്പെടുന്നു.

നമ്മളില്‍ പലരും ഇന്റര്‍നെറ്റും കമ്പ്യൂട്ടറും ഉപയോഗിക്കുന്നവരാണെങ്കിലും ബ്ലോഗിന്റെ അനന്തസാധ്യതകളുടെ വിഹായസ്സിലേക്ക് പറന്നുയര്‍ന്നവര്‍ അധികമില്ല.കൂടുതല്‍ ആളുകളെ ബ്ലോഗിംഗിലേക്ക് അടുപ്പിക്കാനും അതു വഴി ആശയപ്രകാശനത്തെയും ഭാഷയെയും വികസിപ്പിക്കനും ഉദ്ദേശിച്ചാണ് യുവകലാസഹിതി ഈ ശില്‍പ്പശാല നടത്തുന്നത്. ഇതില്‍ ബ്ലോഗിലൂടെ പ്രശസ്തരായ പലരും പങ്കെടുക്കുന്നു. ഈ ശില്‍പ്പശാലയില്‍ എങ്ങനെ ഒരു ബ്ലോഗ് തുടങ്ങാം,എങ്ങനെ അതില്‍ പോസ്റ്റുകള്‍ ഇടാം,അതിന്റെ മറ്റു സാങ്കേതികതകള്‍ എന്നിവ വിശദീകരിക്കപ്പെടുന്നു.

പേര്‍ രജിസ്റ്റര്‍ ചെയ്യുവാന്‍ ആഗ്രഹിക്കുന്നവര്‍ യുവകലാസാഹിതി ഷാര്‍ജാ യൂണിറ്റിന്റെ സെക്രട്ടറി ശ്രീ സുനില്‍‌രാജുമായി (050 4978620) ബന്ധപ്പെടുക.

സുനില്‍രാജ്‌ കെ
സെക്രട്ടറി
യുവകലാസാഹിതി ഷാര്‍ജ യുണിറ്റ്‌

Saturday, April 19, 2008

അതുല്യേച്ചിക്ക് യാത്രയയപ്പ്‌ - റിപ്പോര്‍ട്ട്‌

.വ്യാഴം 7:30 പി.എം.
പൂ ... പൂ ... പൂ...
(മൊബെയിലില്‍ ഹരിപ്രസാദ്‌ ചൗരസ്യ ഓടക്കുഴല്‍ വായിക്കുന്നു...)

ഹലോ..

ഹലോ

എന്താ അഗ്രൂ..

അതു പറഞ്ഞോ...?

യേത്‌...?

ഉഴുന്നു വട പറഞ്ഞോന്ന്...?

ഉഴുന്നു വടയോ ...?

എന്താ കേട്ടിട്ടില്ലേ...? കഴിഞ്ഞ മീറ്റിന്‌ വന്നിരുന്ന് പത്ത്‌ പതിനഞ്ചെണ്ണം തിന്നുന്നത്‌ കണ്ടല്ലൊ...

അത്‌ അഗ്രുവല്ലേ ഓര്‍ഡര്‍ ചെയ്യാമെന്ന് പറഞ്ഞത്‌...

എടോ കോപ്പേ ഞാന്‍ 4 മണിക്ക്‌ തന്നെ വിളിച്ച്‌ പറഞ്ഞതല്ലേ, ഞാന്‍ ചെന്നപ്പോ കട അടച്ചിട്ടേക്കുവാരുന്നു, അതുല്യേച്ചിയുടെ പരിചയക്കാരാ ആ കടക്കാര്‍, അതു കൊണ്ട്‌ ചേച്ചിയേക്കൊണ്ട്‌ ഒന്ന് വിളിപ്പിക്കണം എന്ന്...?

അങ്ങനെ പറഞ്ഞിരുന്നാ ...? അഗ്രൂ ഞാന്‍ ഒരു സത്യം പറയട്ടേ...?

എന്താ ..?

എനിക്കത്‌ തീരെ ഓര്‍മ്മയില്ലാട്ടോ...!!

%$#$%#$@ (ഹൂൂൂൂൂൂൂ.... ഈ തെറിയൊന്നും കേട്ടാ ഈ കക്ഷിയാ ആഴ്ചക്കുറിപ്പെഴുതുന്നേന്ന് ആരും പറയില്ല..)

ഇനിയിപ്പോ എന്താ ചെയ്ക...?

എന്ത് ചെയ്യാന്‍... ഈ ചൂടത്ത്‌ അവിടെ വരെ നടന്ന് പോകാന്‍ എനിക്ക്‌ വയ്യ... നാളെ ആരും വട തിന്നണ്ടാ..

അപ്പു പഴമ്പൊരി വാങ്ങാം എന്ന് പറഞ്ഞിട്ടുണ്ട്‌. അതെന്തായെന്ന് ചോദിക്കട്ടെ..

താനെന്തേലും ചെയ്‌ ... തന്നെ ഏല്‍പ്പിച്ചപ്പോഴേ എനിക്കറിയാരുന്നു..

ക്ഖ്ടക്ച്‌..

ട്രീം.... ട്രീം.... ട്രീം.... ട്രീം....

ഹലോ അപ്പൂ

എന്താ മാഷേ...?

പഴം പൊരി വാങ്ങിയോ...?

മാഷല്ലേ പറഞ്ഞത്‌ അഗ്രു വട വാങ്ങുന്നെന്ന്. മാത്രോമല്ല സന്ധ്യയ്ക്ക്‌ മുന്‍പ്‌ എന്നെ വിളിച്ച്‌ പറയാമെന്നും പറഞ്ഞില്ലേ...?

ഞാനോ...!!!! അങ്ങനെ പറഞ്ഞോ...?

ഉവ്വ്‌ .. പറഞ്ഞു...

ഇനിയിപ്പോ എന്നാ ചെയ്യുക...?

ആ....


ട്രീം....ട്രീം....ട്രീം....ട്രീം....

അത്യുല്യേച്ചീ...

എന്താടാ...?

നാളെത്തേക്ക്‌ എന്തെങ്കിലും ഒന്നുണ്ടാക്കാമോ..?

പിന്നെന്താ...

താങ്ക്യൂ ചേച്ചീ ...എന്തുണ്ടാക്കും...?

വഴക്കുണ്ടാക്കിയാ മതിയോ...?

ചേച്ചീ..

പിന്നേ.... ഇവിടെ എന്തുമ്മാത്രം പണി കെടക്കുന്നു അതിന്റെടേലാ ഇനി ഉണ്ടാക്കാന്‍ പോന്നേ..

എന്നാ ഓകെ.. ചിപ്സും പച്ചവെള്ളൊം നല്ല കോമ്പിനേഷനല്ലേ..?

നാളെ എന്നെ പിക്ക്‌ ചെയ്യാന്‍ നീ വണ്ടി അറേഞ്ച്‌ ചെയ്തിട്ടില്ലേ...?

ഓകെ(ഞാന്‍ ഓകെ പറയും മുന്‍പ്‌ അതുല്യേച്ചി എന്തോ പറഞ്ഞിരുന്നോ .... ശരിക്കു കേട്ടില്ല..)


പൂ പൂ പൂ പൂ‍.....
(ഈ മൊബൈല്‍ കണ്ട് പിടിച്ചോനെ ഇന്ന് ഞാന്‍ തല്ലിക്കൊല്ലും..)

തമനൂ....

എന്താ കുറുമാനേ...?

നാളെത്തേക്ക് എല്ലാം അറേഞ്ച്മെന്റ്സ് ആയോ...?

പിന്നെ എല്ലാം ആയി... കഴിക്കാന്‍ വട മാത്രം പോരേ കുറൂ...

വട മാത്രമോ ... അതിലൊഴിക്കാന്‍ സമ്മന്തീം സാമ്പാറും ഒക്കെ തന്റെ %$#$%@# കൊണ്ടു വരുമൊ...?

(ഇതെന്താ കുറു ഇങ്ങനെ ...? ഓ .. ഇന്ന് വീക്കെന്‍ഡ് .. സമയം 8:30 .. ... അങ്ങനെ വച്ച് നോക്കിയാ ഇത് പോരല്ലോ...)

പേടിക്കണ്ടാ കുറൂ ... വേറെ രണ്ട അറേഞ്ച്മെന്റ്സ് ഇപ്പൊ കഴിഞ്ഞതേ ഉള്ളൂ..

എന്നാ ഓകെ ... നാളെ കാണാം.. ഗ്ലുഷ്ബി..

ഓകെ.. (അവസാനം പറഞ്ഞതെന്താണാവോ ... !!! ഗുഡ് നൈറ്റ് എന്നാരിക്കും..)




18-04-08 വെള്ളിയാഴ്ച.രാവിലെ 10:00 മണി.

പൂ... പൂ...

ഹലോതമനു.... ഇടിവാളാ...

എന്താ ഇടീ ... എത്താന്‍ ഒക്കില്ലേ...?

ഒക്കില്ലേന്നോ..? ഞാന്‍ ഇവിടെ പാര്‍ക്കിന്റെ മുന്‍പില്‍ ഉണ്ട്‌. പത്ത്‌ മണി എന്നല്ലേ പറഞ്ഞത്‌. താന്‍ എവിടാ...?

ഞാന്‍ ദാ പാര്‍ക്കിങ്ങില്‍ ഉണ്ട്‌..

ഏത്‌ പാര്‍ക്കിംഗില്‍... ഫ്രണ്ടിലാ..?

ദേ കരീം മാഷ്‌ വിളിക്കുന്നു.. എന്താന്ന് നോക്കട്ടെ (പിന്നേ ഏതു പാര്‍ക്കിംഗാണെന്നറിഞ്ഞില്ലേല്‍ ഇപ്പൊ ആകാശം വീഴും... ഒന്നു പോടേ..)

ഓകെ


പറയൂ.... കരീം മാഷേ.

ഇതെന്താ തമനൂ ഒരുത്തരവാദിത്തം ഇല്ലാതെ ..?ആരും എത്തിയില്ലേ ഇതു വരേ..?

ഉണ്ടല്ലോ മാഷേ... വരുന്നോരെ ഒക്കെ സ്വീകരിക്കാന്‍ ഇടിവാളിനെ അവിടെ നിര്‍ത്തിയിട്ടുണ്ടല്ലൊ...

ഉണ്ടോ...? ഗുഡ്‌ ... നോക്കട്ടെ..

ഓകെ.

പൂ ... പൂ... പൂ ... (അതുല്യേച്ചിയാണ്‌.... പാര്‍ക്കില്‍ ചെന്നിട്ട്‌ വിളിക്കുകയാരിക്കും..)

തമനൂ...

എന്തോ....?

ഞാന്‍ റെഡിയാണ്‌ കേട്ടൊ...?

എവിടെ പാര്‍ക്കിലാ...?

പാര്‍ക്കിലല്ല.. വീട്ടില്‍... നീയല്ലേ എന്നെ പിക്ക്‌ ചെയ്യാമെന്ന്‌ പറഞ്ഞത്‌...?

ഞാനങ്ങനെ പറഞ്ഞാ...?

ഡാ തെണ്ടീ....

ഓകെ ഓകെ ഓകെ .. ചേച്ചി ഒരു കാര്യം ചെയ്‌... ഒരു 10:10 ന്‌ ബില്‍ഡിംഗിന്റെ മുന്നില്‍ റെഡിയായി നില്‍..

ഓകെ ഡാ കുട്ട്യേ എനിക്കറിയാം നീ മിടുക്കനാണെന്ന്..

എന്നിട്ട്‌ ഒരു 10:15 ന്‌ ഒരു ടാക്സി വിളിച്ച്‌ നേരേ പാര്‍ക്കിലോട്ട്‌ പോര്‌..
(ബാക്കി കേള്‍ക്കാന്‍ നിന്നില്ല)

എങ്കിലും അഗ്രുവും, അപ്പുവും, ദേവേട്ടനും, അതുല്യേച്ചിയും ഒക്കെ ഞാന്‍ ഉദ്ദേശിച്ചതിനേക്കാള്‍ ഡീസന്റായിരുന്നത്‌ കൊണ്ട്‌ രാവിലെ തന്നെ വട, പഴം പൊരി, പക്കാവട, പേരറിയാത്ത ഒരു പലഹാരം ഒക്കെ റെഡിയാരുന്നു. കുറുമാനും, ദേവേട്ടനും, അപ്പുവും, അതുല്യേച്ചിയും, അഗ്രുവും, തറവാടിയും,കിലുക്കാം‌പെട്ടിയും, ഭടനും ഒക്കെ എഴുതിയതു പോലെ മീറ്റ്‌ വളരെ ഭംഗിയായിരുന്നു. (ഒരു നല്ല സംഘാടകനുള്ള അവാര്‍ഡ്‌ എനിക്കു നല്‍കിയില്ലെന്ന ഒരു കുഴപ്പം ഒഴിച്ചാല്‍...)

അനുബന്ധം : ആകെ ഒരു സമാധാനം രാവിലെ പാര്‍ക്കില്‍ വച്ച്‌ ദില്‍ബുവിനെ കണ്ടപ്പോഴാരുന്നു..

ഡേ ദില്‍ബാ... മീറ്റിന്‌ വരാന്‍ എല്ലാരേം വിളിച്ചിട്ടുണ്ടല്ലൊ അല്ലേ...?

സമയം കിട്ടിയില്ലച്ചായാ ... നാളെ എന്തായാലും വിളിക്കാം ... പക്കാ..

$#$#^%&%#@

Friday, April 18, 2008

യൂ ഏ ഈ ബൂലോഗരത്നം അതുല്യയ്ക്ക്‌

യൂ ഏ ഈ ബൂലോഗത്തിന്റെ പരമോന്നത ബഹുമതിയായ ബൂലോഗരത്നം ആദ്യകാല ബ്ലോഗറായ ശ്രീമതി അതുല്യയ്ക്ക്‌ സമ്മാനിച്ചു.

ഇവരെ നാടുകടത്താനുള്ള തീരുമാനത്തെ ഇന്നു രാവിലെ ഷാര്‍ജ്ജ ജസീറ പാര്‍ക്കില്‍ ചേര്‍ന്ന ബൂലോഗരുടെ സമ്മേളനം മുക്തകണ്ഠം പ്രശംസിച്ചു. യോഗത്തില്‍ ഒട്ടേറെ ബ്ലോഗര്‍മാര്‍ പങ്കെടുക്കുകയും കിട്ടിയ ഉള്ളിവടയും പരിപ്പുവറുത്തതും പഴം പൊരിയും പങ്കിട്ടെടുക്കുകയും ചെയ്തു.

ആദ്യമായാണ്‌ ഒരു ബൂലോഗമീറ്റില്‍ നിന്നും ശര്‍മ്മാജി വിട്ടുനില്‍ക്കുന്നതെന്നത്‌ ശ്രദ്ധേയമായി. ഓഫീസില്‍ വലിയ തിരക്കുള്ളതുകൊണ്ടാണ്‌ അദ്ദേഹമെത്താത്തതെന്ന അതുല്യയുടെ നുണയെ പൊളിച്ചുകൊണ്ട്‌ അദ്ദേഹം ഞങ്ങളെ ഫോണില്‍ വിളിച്ച്‌ ഉമ്മല്‍കുവൈന്‍ ബാരക്കൂടയില്‍ ആണു താനിപ്പോഴെന്നും, "പൊണ്ടാട്ടി ഊരുക്കു പോകിറാളേ" എന്ന പാട്ടിനൊപ്പം നൃത്തം ചെയ്തുകൊണ്ടിരിക്കുകയാണെന്നും വെളിപ്പെടുത്തുകയുണ്ടായി.

ചിത്രങ്ങള്‍ കൊള്ളാവുന്ന പടം എടുത്തവര്‍ വഴിയേ പോസ്റ്റ്‌ ചെയ്തുകൊള്ളും. വാര്‍ത്തയ്ക്ക്‌ അവശ്യം വേണ്ടവ മാത്രം താഴെ.

ബ്ലോഗര്‍മാരായ ശ്രീ. കൈതമുള്ള്, ശ്രീമതി ചന്ദ്രകാന്തം എന്നിവര്‍ ചേര്‍ന്ന് ബൂലോഗരത്നം അതുല്യയ്ക്കു സമ്മാനിക്കുന്നു.


ബൂലോഗരത്നം അവാര്‍ഡിയുടെ കയ്യില്‍


ഉപ്പയെടുക്കണ ഫോട്ടോയ്ക്ക് പോസ് ചെയ്ത് ആരും സമയം പാഴാക്കല്ലേ- അഗ്രജന്‍, പാച്ചു.


ബ്ലോഗ് ജൂനിയര്‍മാരുടെ റെസ്ലിങ്ങ് മത്സരത്തില്‍ നിന്ന്


അപ്പോ ഇതേലോട്ട് നോക്കിയിട്ട് ആ ബട്ടന്‍ ഞെക്കിയാല്‍ അപ്പു എടുക്കുന്നപോലത്തെ ഫോട്ടോ എനിക്കും എടുക്കാമോ? അവാര്‍ഡു ജേതാവിന് ഒരു ഫോട്ടോഗ്രഫി പാഠം


പ്രത്യ്യേക അറിയിപ്പ്‌:
സമ്മേളന നഗരിയില്‍ ഇരിക്കവേ "ദാ ഒരഞ്ചു മിനുട്ട്‌, ഞാന്‍ ട്രഷററായിരിക്കുന്ന കോളെജ്‌ അലുമിനിയുടെ വരവു ചിലവ്‌ കണക്ക്‌ അവതരിപ്പിച്ചിട്ട്‌ ഇപ്പോ മടങ്ങിയെത്താമെന്ന്" പറഞ്ഞു പോയ ഇടിവാളിനെക്കുറിച്ച്‌ പിന്നീട്‌ വിവരമൊന്നും ലഭിച്ചിട്ടില്ല. കണ്ടുമുട്ടുന്നവര്‍ ദയവായി അടുത്തുള്ള കോട്ടയ്ക്കല്‍ ആര്യവൈദ്യശാലയിലോ ജാപ്പനീസ്‌ ഷിയാറ്റ്‌സൂ ക്ലിനിക്കിലോ എത്തിക്കുകയോ കുറച്ചു വെള്ളം കുടിപ്പിച്ചിട്ട്‌ താങ്ങി വീട്ടിലെത്തിക്കുകയോ ചെയ്യാന്‍ അപേക്ഷ


==============================

കൂടുതല്‍ ഫോട്ടോകള്‍ / പോസ്റ്റുകള്‍:

അപ്പു വഹ

തറവാടി വഹ

ഇതുമായി ബന്ധപ്പെട്ട മറ്റുപോസ്റ്റുകള്‍::

കുറുമാന്‍, ദേവേട്ടന്‍, അപ്പു, അതുല്യേച്ചി, അഗ്രു, തറവാടി,കിലുക്കാം‌പെട്ടി, ഭടനും

അതുല്യേച്ചിക്ക് യാത്രയയപ്പ്.

ഇന്നലെ ഉറങ്ങീയത് ഇന്ന് വെളുപ്പിന് നാലരക്കാ...രാവിലെ ഒമ്പതേകാലിനു ഫോണ്‍ നിലവിളിച്ചപ്പോള്‍ പിറുപിറുത്തുകൊണ്ട് ഫോണ്‍ എടുത്തു....

കുറുമാനെ, ഞാന്‍ ഇവിടെ എത്തി.

ഞാന്‍ എവിടെ എത്തി?

കരാമ സെന്ററില്‍.....

ഓഹോ, താനാരാ?

അത് ശരി, ഞാന്‍ ഇത്തിരി.

ഓഹ് സോറി ഇത്തിരി, വീക്കെന്റ് സിന്‍ഡ്രോം ഉള്ളതിനാല്ല് രാവിലെ ഇന്നലെ വൈകീട്ട് സംസാരിച്ചാതൊക്കെ മറന്നുപോയി. താന്‍ ഫ്ലാറ്റില്‍ വാ, ഞാന്‍ ദാ ഇപ്പോ റെഡിയാകാം.

ഓ ശരി.

തലേന്നത്തെ സംഭാഷണങ്ങള്‍ ഒന്ന് റിവൈന്‍ഡ് ചെയ്തു. ഹരിയണ്ണന്‍ സാരഥിയാവാമെന്ന് പറഞ്ഞതിനാല്‍ വീക്കെന്റ് അര്‍മാദിച്ച് തിരിച്ചു വന്നത് നാലരക്കായിരുന്നു. പക്ഷെ ഹരിയണ്ണന്‍ ഇന്ന് സാരഥിയാവാമെന്ന് പറഞ്ഞിരുന്ന വാക്ക് അദ്ദേഹത്തിന് ചില അതിഥികള്‍ വരുന്നതിനാല്‍ പിന്‍വലിച്ചത് ഞാന്‍ അന്നേരത്തെ ആവേശത്തില്‍ മറന്നുപോയിരുന്നത് പിന്നേം ഓര്‍മ്മ വന്നു.

കമ്പിളിക്കുള്ളില്‍ നിന്നും പുറത്ത് വന്ന് പല്ലുതേപ്പ്, കുളി, പ്രാര്‍ത്ഥന എല്ലാം കഴിഞ്ഞ്, തലയില്‍ രോമം ഫിറ്റ് ചെയ്ത് വണ്ടിയ്ടെ ചാവിയുമെടുത്ത്, ഞാന്‍ പോവ്വാട്ടാ എന്ന് നല്ലപാതിയോട് യാത്രപറഞ്ഞപ്പോ ഉച്ചത്തില്‍ ഒരു അറിയിപ്പ്.

ദേ ഇന്നലെ രാത്രി കഴിക്കാന്‍ ഉണ്ടാക്കിയ ചപ്പാത്തിയും, പാലക്ക് പനീറും ഉണ്ട്, അത് കഴിക്കാണ്ട് നിങ്ങള്‍ എങ്ങോട്ടും പോകുന്നില്ല.

തിരുവായ്ക്കെതീര്‍വായ്പ്പില്ലാത്തതിനാല്‍, ചൂടാക്കീ വച്ച രണ്ട് ചപ്പാത്തി ചൂടായി കഴിച്ച് ഉഷാറായി. മൂന്നാമത്തെ ചപ്പാത്തിക്ക് നില്‍ക്കാഞ്ഞത്, അവിടെ വിളമ്പാന്‍ പോകുന്ന സാമ്പാറും, ചട്നിയുമൊക്കെ മനസ്സില്‍ കണ്ടാണ്.

ചപ്പാത്തി കഴീച്ച് കഴിഞ്ഞിട്ടും ഇത്തിരിയുടെ വെട്ടം കാണാഞ്ഞതിനാല്‍, ഞാന്‍ ഫ്ലാറ്റിന്റെ താഴോട്ട് കെട്ടിയെടുത്തു.

ഫോണില്‍ നമ്പര്‍ കുത്തി.

ഡോ താനെവീടെ?

ഞാന്‍ ദാ ഇവിടെ?

എവിടെ?

ദേ ഇങ്ങോട്ട് നോക്ക്!!

എങ്ങോട്ട്?

അപ്പോഴേക്കും ഇത്തിരിയുടെ വെട്ടം എന്റെ കണ്ണിലടിച്ചു.

താന്‍ എന്താ ഫ്ലാറ്റില്‍ വരാതിരുന്നത്? ബേസ്മെന്റ് പാര്‍ക്കിങ്ങിലേക്കുള്ള കോണിപടികള്‍ ഇറങ്ങികൊണ്ടിരുന്നപ്പോള്‍ ഞാന്‍ ചോദിച്ചു.

അതിന്‍ നിങ്ങളേന്നോട് ഫ്ലാറ്റില്‍ വരാന്‍ പറഞ്ഞത് ഞാന്‍ കേട്ടില്ല.

ദൈവമേ, വീക്കെന്റ് സിന്‍ഡ്രോം എനിക്കോ അതോ ഇത്തിരിക്കോ?

വണ്ടിയില്‍ കയറിയപ്പോഴേക്കും ഫോണ്‍ വീണ്ടും നിലവിളിച്ചു.

ഡോ, താനെവിട്യേഷ്ടാ?

ഇടിവാള്‍!

താനെവിടെ? മറുചോദ്യം ഞാന്‍ തൊടുത്തു.

ഞാന്‍ അല്‍ ജസീറയിലെത്തിഷ്ടാ!

ഉവ്വോ? ഞാന്‍ ദേ അല്‍മുള്ളയെത്തിഷ്ടാ (കരാമ സെന്ററിലെ പാര്‍ക്കിങ്ങില്‍ നിന്നും വണ്ടി തിരിച്ചിട്ട് പോലുമില്ല ഭാര്യയും പിള്ളാരും ഇന്നലെ ഒരാഴ്ചക്ക് നാട്ടില്പോയതിനാല്‍ ബോറടിച്ചീട്ട് കൊച്ചുവെളുപ്പാന്‍ കാലത്ത് എഴുന്നേറ്റ് കുട്ടപ്പനായി കണ്ണടയും ഫിറ്റ് ചെയ്ത് പത്തുമണിക്ക് എല്ലാവരും എത്തിചേരണമെന്ന് പറഞ്ഞ മീറ്റിന് ഒമ്പതേമുക്കാലിനു തന്നെ വന്ന അദ്ദേഹത്തോട് ഞാന്‍ വേറെ എന്തു പറയാന്‍?)

വെള്ളിയാഴ്ചയായതിനാല്‍ ട്രാഫിക്ക് ഇല്ലായിരുന്നു. അതിനാല്‍ തന്നെ കൃത്യം പത്തേ പത്തിന് ഞങ്ങള്‍ അല്‍ ജസീറ പാര്‍ക്കില്‍ വണ്ടി പാര്‍ക്ക് ചെയ്തിറങ്ങിയതും, തൊട്ടടുത്ത പാര്‍ക്കിങ്ങില്‍ ലോട്ടില്‍ ഒരു നിസ്സാന്‍ അള്‍ട്ടിമ പാര്‍ക്ക് ചെയ്തു. അതാരാപ്പാ ഇത്രരാവിലെ പാര്‍ക്കിലേക്ക് ഞങ്ങളെ കൂടാതെ വന്നിരിക്കുന്നതെന്ന് അന്ധാളിച്ച് നോക്കിയപ്പോള്‍ വണ്ടിയിലുണ്ടായിരുന്ന സവാരി ഗിരി ഗിരികള്‍ ഡോര്‍ തുറന്ന് പുറത്തോട്ട് ചുവട് വെച്ചു.

കൈതമുള്ള് അഥവാ ശശിയേട്ടന്‍
വഴിപ്പോക്കന്‍ (വഴിപ്പോക്കനെന്താ പാര്‍ക്കില്‍ എന്നാരോ ചോദിക്കുന്നത് ഞാന്‍ കേട്ടൂ)
കിലുക്കാം പെട്ടി.

എല്ലാരും ഒരുമിച്ച് നടന്നു പാര്‍ക്കിലേക്ക്.

ടിക്കറ്റ് കൌ‍ണ്ടറടുത്തപ്പോള്‍ പതിവുപോലെ ഞാന്‍ പിന്നിലേക്ക് മാറി അവിടേം ഇവിടേം നോക്കി നിന്നു. ആരേലും എടുത്താല്‍ ഉള്ളില്‍ കയറിയാല്‍ മതിയല്ലോ.

എല്ലാവരും പോക്കറ്റില്‍ കയ്യിട്ടിട്ടും പേഴ്സ് പുറത്തേക്ക് വരൂന്നില്ലായിരുന്നു, ഞാനടക്കം. ഭാഗ്യത്തിന് ശശ്യേട്ടന്റെ പേഴ്സ് പുറത്തായി. അദ്ദേഹം ടിക്കറ്റെടുക്കാന്‍ പൈസ കൊടുത്തപ്പോഴേക്കും ഞങ്ങളുടെ എല്ലാവരുടേയും പേഴ്സ് ഒരുമിച്ച് പുറത്ത് വന്നു. ഞാന്‍ കൊടുക്കാം, ഞാന്‍ കൊടുക്കാം എന്ന് പറഞ്ഞൊരു മത്സരം തന്നെ അവിടെ നടന്നു. അപ്പോഴേക്കും ശശിയേട്ടന്റെ കയ്യില്‍ ടിക്കറ്റ് കിട്ടിയതിനാല്‍ പേഴ്സിനെ എല്ലാരും ഭദ്രമായി പോക്കറ്റില്‍ തിരിച്ചു തിരുകി.

പാര്‍ക്കിലേക്ക് നടന്ന് കയറി.

വന്ന് ചേര്‍ന്നവരുടെ ലിസ്റ്റ് ഇപ്രകാരം.

അഗ്രജന്‍ - പാച്ചു,
അപ്പു, ക്യാമറ
ദേവേട്ടന്‍, വിദ്യേച്ചി, ദേവദത്തന്‍ ദ ഗ്രേറ്റ്
ഡില്‍ബാസുരന്‍, റെസീപ്റ്റ് കുറ്റി
ഇഡിവാള്‍ + കണ്ണട
ഇത്തിരിവെട്ടം
കൈതമുള്ള് (അതിഥി ഉണ്ടായിരുന്നതിനാല്‍ ചേച്ചി വന്നില്ല)
കരീം മാഷ്
കുറുമാന്‍ + വിഗ്ഗ്
രാധേയന്‍, രാധേയി, രണ്ട് പൈതങ്ങള്‍
സിദ്ധാര്‍ത്ഥന്‍
തമനു
തറവാടി, വല്യമ്മായി + ക്യാമറ
വിശാലന്‍,
പാര്‍പ്പിടം കുമാര്‍
ഹരിയണ്ണന്‍, സുഹൃത്തുക്കള്‍ രണ്ട് മൂന്നു പേര്‍
ചന്ദ്രകാന്തം, ചന്ദ്രകാന്തന്‍, സ്കേറ്റിങ്ങ് ബോര്‍ഡില്‍ വന്ന പുത്രന്‍ + പുത്രി
വഴിപോക്കന്‍
ഭടന്‍ (ഇദ്ദേഹം കോട്ടക്കല്‍ മേഡ് ആയുര്‍വേദ ഡോക്ടര്‍ ആണെന്ന് ഇന്നാ അറിഞ്ഞത്)
കിലുക്കാം പെട്ടി.

ഇനീ ആരേങ്കിലും വിട്ടുവോ ആവോ?

ഉവ്വ്.

ഉവ്വ്.

വിട്ടു.

അതുല്യാമ്മ!!

ഭാക്കി ഭാഗം രാത്രി എഴുതാംട്ടാ..അപ്പോഴേക്കും ഫോട്ടോകള്‍ അപ്പുവും, അഗ്രജനും, തറവാടിയും ഒക്കെ പോസ്റ്റ് ചെയ്യും എന്ന് കരുതട്ടെ

ഊണുകഴിച്ച് ഉറങ്ങട്ടെ.

Wednesday, April 16, 2008

അതുല്യേച്ചിക്ക് ഒരു റ്റാറ്റാ

അതുല്യ എന്ന ബ്ലോഗറെ അറിയാത്തവര് ചുരുക്കമായിരിക്കും. ഞങ്ങള് യു.എ.ഇ. ബ്ലോഗേഴ്സിന്‍റെ ഒരു അഹങ്കാരം തന്നെയാണ് അതുല്യേച്ചി എന്ന് പറഞ്ഞാല് ആരും തല്ലില്ലെങ്കില് അതൊരു അതിശയോക്തിയല്ല… (ഒരു വരിയല്ലേ… കിടക്കട്ടെ, വല്യ ചെലവൊന്നുമില്ലല്ലോ). ഇത്രേം കാലം യു.എ.ഇ. ബ്ലോഗര്‍മാരിലൊരാളായിരുന്ന അതുല്യേച്ചിക്ക് കുറച്ച് കാലം അവധി നല്കി കൊച്ചിക്ക് വിടാന്‍ ഞങ്ങള്‍ തീരുമാനിച്ചിരിക്കുന്നു (പാവം കൊച്ചി..:)

മകന്റെ പഠന സൌകര്യാര്‍ത്ഥം യു.എ.ഇ.യില്‍ നിന്നും ഒരു നീണ്ട അവുധി എടുത്ത്, ഏപ്രില്‍ 21 നു നാട്ടിലേക്ക് പോകുന്ന അതുല്യേച്ചിക്ക് ഒന്ന് ബൈ പറയാന്‍, ചുമ്മാ ഒരാശംസ പറയാന്‍... വരുന്ന വെള്ളിയാഴ്ച (ഏപ്രില്‍ പതിനെട്ട്) ഷാര്‍ജയിലുള്ള അല്‍ ജസീറ പാര്‍ക്കില്‍ കൂടുന്നു.

രാവിലെ 10 മണിക്ക് കൂടുന്നു.... കുറച്ച് കത്തിയടിക്കുന്നു, വെയിലുറയ്ക്കും മുന്‍പ് പിരിയുന്നു. അത്ര മാത്രം.

ദുബൈ-ഷാര്‍ജ റോഡില്‍, അല്‍-ഖാനില്‍ നിന്നും റോളയ്ക്ക് പോകും വഴി ഗോള്‍ഡ് സൂഖ് എത്തും മുന്‍പ് വലത്ത് വശത്തായി ആണ് അല്‍ ജസീറ പാര്‍ക്ക്.സമയവും സൌകര്യവും ഉള്ളവര്‍ പങ്കെടുക്കും എന്ന് കരുതുന്നു.

Thursday, April 03, 2008

ബ്ലോഗ്ഗേഴ്സ് - ക്രീക്ക് പാര്‍ക്ക് സംഗമം.വീഡിയൊ.

video


ബ്ലോഗ്ഗേഴ്സ് - ക്രീക്ക് പാര്‍ക്ക് സംഗമത്തിലെ ചില ദൃശ്യങ്ങള്‍ , ആരെയെങ്കിലും വിട്ടു പോയിട്ടുണ്ടെങ്കില്‍ ക്ഷമിക്കുക.

Monday, March 31, 2008

ഇമറാത്തിലെ ബൂലോഗ ഡയറക്റ്ററി

ഇമറാത്തിലെ പുതിയ ബ്ലോഗേഴ്സിന്റെ ശ്രദ്ധയ്ക്ക്,

യു.എ.ഇ. യില്‍ നിന്നുള്ള എല്ലാ ബ്ലോഗേഴ്സിന്റെയും (പരസ്യപ്പെടുത്താന്‍ താല്പര്യമുള്ളവരുടെ മാത്രം) പേരും, ഫോണ്‍ നമ്പരും, ഈമെയില്‍ ഐഡിയും ഒക്കെ അടങ്ങിയ ഒരു ബൂലോഗ ഡയറക്റ്ററി നമ്മള്‍ സൂക്ഷിക്കുന്നുണ്ട്. അതില്‍ പേര് ചേര്‍ത്തിട്ടുള്ള എല്ലാവര്‍ക്കും അത് ഓണ്‍ലൈനില്‍ ആക്സസബിളും ആണ്. ദില്‍ബാസുരന്‍ എന്ന ബ്ലോഗറാണ് ഇപ്പോള്‍ അത് പ്രധാനമായും കൈകാര്യം ചെയ്യുന്നത്.

ഈ കഴിഞ്ഞ മീറ്റില്‍ പങ്കെടുത്ത വളരെയേറേ പുതിയ ബ്ലോഗേഴ്സിന്റെ പേരും ഡീറ്റെയിത്സും അതില്‍ ഉള്‍പ്പെടുത്തേണ്ടിയിരിക്കുന്നു.

അതില്‍ പേരും, ടെലഫോണ്‍ നമ്പരും മറ്റും ചേര്‍ക്കാന്‍ താല്പര്യമുള്ളവര്‍ ദയവു ചെയ്ത് dilbaasuran@gmail.com എന്ന ഐഡിയിലേക്ക് ഒരു മെയില്‍ അയക്കാന്‍ താല്പര്യപ്പെടുന്നു. (ഇവിടെ കമന്റുകളായി ഇടണം എന്നില്ല, നേരിട്ട് അയച്ചാല്‍ മതി)

Sunday, March 30, 2008

അനോണികളുടെ പ്രസക്തി യൂയേയി മീറ്റില്‍

തറവാടി: അതെന്തിനാ അനോണിയായി കമന്റിടുന്നതു് അവരവരുടെ പേരിലങ്ങിട്ടാല്‍ എന്താണു കുഴപ്പം?
കൈപ്പള്ളി: അല്ലല്ല അനോണികള്‍ക്കു പ്രസക്തിയുണ്ടു്. പറയാം...

യൂയേയി ട്രാഫിക് നിയമങ്ങള്‍ക്കും അതിനെ ഒട്ടും മാനിക്കാത്ത ട്രാഫിക്കിനും എതിരേ വണ്ടിയോടിച്ചു് മീറ്റരങ്ങിലെത്തിയതിനും, അതുല്ല്യാമ്മ സ്നേഹപൂര്‍വം കൊണ്ടു വന്നു നിരത്തിവച്ച ഉഴുന്നുവടകള്‍ കണ്ണില്‍പ്പെടുന്നതിനും ഇടയ്ക്കുള്ള സമയം കൊണ്ടു് എനിക്കു കേള്‍ക്കാന്‍ കഴിഞ്ഞ സംഭാഷണ ശകലമാണു് മുകളില്‍.

ബ്ലോഗര്‍മ്മാരുടെ നിരന്തര ആക്രമണങ്ങള്‍ക്കു വിധേയമായി വൃത്താകൃതിനഷ്ടപ്പെട്ട ഉഴുന്നുവടകളിലെ തുളകള്‍ക്കിടയിലൂടെ മെമ്മറി പയ്യന്മാര്‍ പുറകോട്ടോടി, ഇപ്പറഞ്ഞതിന്റെ ബാക്കി ഭാഗം പൂരിപ്പിച്ചു.

സമയം: വിശാലന്റെ നല്ല സമയം
സ്ഥലം: കൊടകരപുരാണം പ്രകാശന ചടങ്ങു്. കരീം മാഷെടുത്ത ചിത്രം ശ്രദ്ധിക്കൂ.



മുഖവുരിക്കാന്‍ മൈക്കു പിടിച്ച വിത്സന്‍ മുഖവുരയും കഴിഞ്ഞു് ബഹുകാതം സഞ്ചരിക്കുന്നതു കണ്ടു് വേദിയിലിരുന്നവര്‍ അസ്വസ്ഥരായി. മൈക്കു വേറൊന്നു് കാശുകൊടുത്തു് വാങ്ങേണ്ടിവരുമോ എന്നു് ആശങ്കിച്ചിരിപ്പാണു് ഈയുള്ളവനടക്കമുള്ളവര്‍. കൈപ്പള്ളി എന്നെ നോക്കി. ഞാന്‍ പിരിവു വേണെങ്കിലിടാം എന്നു ദയനീയമായി പറഞ്ഞു. പിന്നെ കണ്ടതു് കക്ഷിയുടെ കാലു് വിത്സന്റെ കാലുമായി ബന്ധം സ്ഥാപിക്കുന്നതാണു്. വിത്സനു് ഒരു ചവിട്ടു കൊടുത്ത ശേഷം എന്നെ നോക്കി ഒരു ചിരി. എന്നിട്ടു പറഞ്ഞു “ഞാനൊരു അനോണി കമന്റിട്ടു”. അതു കൊണ്ടാണോ എന്നറിയില്ല, വിത്സന്‍ വിരമിച്ചു. വളരെ വിഷമിച്ചു് വേറേയാര്‍ക്കോ മൈക്കു കൊടുത്തു.
...

ആഹാരസാമഗ്രികള്‍ ഒന്നെണ്ണിത്തിട്ടപ്പെടുത്തുമ്പോഴേക്കും നേരം ഇരുട്ടാ‍റായി. കേക്കു മുറിച്ചു് ആര്‍ക്കൊക്കെയോ കൊടുത്തു് ദേവനേയും കൂട്ടി തിരിഞ്ഞു നടന്നു. ഇതിനിടയില്‍ ആരെയൊക്കെയോ കണ്ടു. അഗ്രജന്‍ ക്ഷീണിച്ചിരിക്കുന്നു. സുല്ലു് വണ്ണം വച്ചു. അതുല്യ അടുത്തമീറ്റിനുണ്ടാവില്ലെന്നു പറഞ്ഞു. കൈതമുള്ളിനു കൈ കൊടുത്തോ എന്നോര്‍മ്മയില്ല. വിശാലന്‍ പെരുവണ്ണാപുരത്തെ വിശേഷങ്ങളിലെ മോഹന്‍ലാലിനെ പോലെ വന്നു് റ്റാറ്റ പറഞ്ഞു. സൂര്യന്‍ വീട്ടീപ്പോയി.

Saturday, March 29, 2008

യു.എ.ഇ. ബ്ലോഗേഴ്സ് മീറ്റ് (പിക്നിക്) 2008 - റിപ്പോര്‍ട്ട്

ബ്ലോഗ് എന്ന മാധ്യമത്തിലൂടെ പരിചയപ്പെട്ട കുറേ പേര്‍ ഒന്നിച്ച് ചേര്‍ന്ന് കുറേ നല്ല നിമിഷങ്ങള്‍ പങ്കുവെച്ചു... അതെ, അതു തന്നെയായിരുന്നു പോയ വെള്ളിയാഴ്ചയുടെ സായഹ്നത്തില്‍ ക്രീക്ക് പാര്‍ക്കില്‍ അരങ്ങേറിയത്.

മുന്‍പ് കണ്ടിട്ടുള്ളവരും ആദ്യമായി കാണുന്നവരും ചിരകാലമായി അറിയുന്നവരെ പോലെ സൌഹൃദം പങ്കുവെക്കുന്ന കാഴ്ച... അതിനെ മീറ്റെന്നോ പിക്നിക്കെന്നോ കൂട്ടായ്മയെന്നോ കൂടിച്ചേരലെന്നോ... എന്ത് പേരില്‍ വേണമെങ്കിലും നമുക്ക് വിളിക്കാം. പക്ഷെ, എന്ത് പേരിട്ട് വിളിച്ചാലും അതിന്‍റെ മുന്‍പ് ഒരു വാക്ക് കാണും. അവിടെ കൂടിയിരുന്നവരുടേയെല്ലാം പരിചയത്തിന് ഹേതുവായത് ബ്ലോഗ് എന്ന മാധ്യമം തന്നെയായിരുന്നു.

എല്ലാവരും ചേര്‍ന്ന് ആത്മാര്‍ത്ഥതയോടെ പരസ്പരം കാണണം പരിചയപ്പെടണം എന്ന ആഗ്രഹത്തോടെ സംഘടിപ്പിച്ച ഈ പരിപാടി എല്ലാവരുടേയും ആത്മാര്‍ത്ഥമായ സഹകരണത്തോടെ വിജയകരമായി തീര്‍ന്നിരിക്കുകയാണ്.

യു.എ.ഇ. യുടെ പലഭാഗങ്ങളില്‍ നിന്നും എത്തിയവര്‍, മൂന്ന് മണിക്കും അതിനു മുമ്പ് തന്നേയും എത്തിച്ചേര്‍ന്നവര്‍... തിരക്കുകള്‍ക്കിടയിലും സമയമുണ്ടാക്കി അവസാന നിമിഷങ്ങളില്‍ എത്തിച്ചേര്‍ന്നവര്‍, എല്ലാവരും ഈ പരിപാടിയില്‍ പങ്കെടുക്കുക എന്ന ആത്മാര്‍ത്ഥമായ ആഗ്രഹത്തോടെയാണ് അവിടെ എത്തിച്ചേര്‍ന്നത്.

കുഞ്ഞുങ്ങളുള്‍പ്പെടെ പങ്കെടുത്ത എല്ലാവരുടേയും പേരുകള്‍ ചേര്‍ക്കുന്നു, ആരേയും വിട്ടുപോയിട്ടില്ല എന്ന് വിചാരിക്കുന്നു. ആരെയെങ്കിലും വിട്ടുപോയതായി ശ്രദ്ധയില്‍ പെട്ടാല്‍ ദയവായി അറിയിക്കണം. ഇതില്‍ പങ്കെടുത്ത എല്ലാവര്‍ക്കും നമ്മളോരോരുത്തരുടേയും പേരില്‍ നന്ദി അറിയിക്കട്ടെ... പ്രത്യേകിച്ചും ബ്ലോഗര്‍മാരല്ലാത്ത... ബ്ലോഗര്‍മാരെ സഹിച്ച എല്ലാവര്‍ക്കും :)

അതുല്യ, ശര്‍മ്മാജി
അനില്‍ശ്രീ, പ്രിയ, ആദ്യത്യ, ആദര്‍ശ്
അപ്പു, ദീപ, ഉണ്ണിമോള്‍, മനു
അത്ക്കന്‍
ഇത്തിരിവെട്ടം
ഉഗാണ്ട രണ്ടാമന്‍
കനല്‍
കരീം മാഷ്
കുറുമാന്‍, കവിത, റിഷിക, അവന്തിക
കാവലാന്‍
കൈതമുള്ള്, പ്രേമ
കൈപ്പള്ളി
ചന്ദ്രകാന്തം
ചുള്ളിക്കാല ബാബു
തമനു
തറവാടി, വല്യമ്മായി, പച്ചാന, ആജു, ഫിറാസ്, സജ്ന
ദില്‍ബാസുരന്‍
ദേവന്‍, വിദ്യ, ദത്തന്‍
നിതിന്‍ വാവ & പാരന്‍റ്സ് ഷംസുദ്ദീന്‍, വഹീദ
പട്ടേരി
പൊതുവാള്‍
ബൈജു സുല്‍ത്താന്‍, റസീന, അജ്ന, അന്‍സില്‍
ഭടന്‍, സറീന, ഫറാഷ, ഫെന്‍സിര്‍
മുസാഫിര്‍, ശ്രീലത, നിതീഷ്, ഋതിക് & സതീഷ്, ഷീന
മുഹമ്മദ്
മിന്നാമിനുങ്ങ്
രാധേയന്‍, ഭദ്ര (മകള്‍)
വഴിപോക്കന്‍
വിശാലമന‍സ്കന്‍‍
ശരത്
ശിവപ്രസാദ് (മൈനാഗന്‍)
ശ്രീജിത്ത്
ഷംസ്
ഷാരു
സമീഹ, ഷഫീഖ് (ബ്രദര്‍)
സുല്‍, ഹസീന, അമി, അനു
സൂരജ്
സാക്ഷി, ആതിര
സിദ്ധാര്‍ത്ഥന്‍, ഷെമീന, ബിലാല്‍
സിമി
ഹരിയണ്ണന്‍
അഗ്രജന്‍, മുനീറ, പാച്ചു

ഇനിയും നമുക്ക് ഇടയ്ക്കിടെ ഇതുപോലെയൊക്കെ കൂടണം, കത്തിവെക്കണം, ഫുഡ്ഡടിക്കണം, പടം പിടിക്കണം...

വേണ്ടേ...? വേണം!

ഫോണിലൂടെ ഈ പരിപാടിക്ക് ആശംസകള്‍ അറിയിച്ച കലേഷ്, തഥാഗതന്‍, ബയാന്‍, അഭിലാഷ്, കുട്ടന്മേനോന്‍, ദേവദാസ്, ആഗ്നേയ എന്നിവര്‍ക്ക് സ്നേഹത്തോടെ നന്ദി അറിക്കുന്നു!

രുചികരമായ ഭക്ഷണസാധങ്ങള്‍ എത്തിച്ച എല്ലാവര്‍ക്കും പ്രത്യേകം നന്ദി, ഇനിയും ഇതുപോലുള്ള എല്ലാ പരിപാടികളിലും ഈ നന്ദി ഏറ്റുവാങ്ങാന്‍ നിങ്ങള്‍ക്കാവട്ടെ :)

പിന്നെ, എല്ലാ മീറ്റുകളിലും കുഞ്ഞുങ്ങള്‍ക്ക് സമ്മാനങ്ങളുമായി എത്തി മീറ്റിനെ കളര്‍ഫുള്‍ ആക്കുന്ന ശര്‍മ്മാജിക്ക് എല്ലാവരുടെ പേരിലും പ്രത്യേകം നന്ദി അറിയിക്കട്ടെ!

മീറ്റിനോടനുബന്ധിച്ച പടങ്ങളും പോസ്റ്റുകളും:-

അപ്പു വഹ

അനില്‍ ശ്രീ‍ വഹ ‍

തറവാടി വഹ

കനല്‍ വഹ

ദേവേട്ടന്‍ വഹ

അതുല്യേച്ചി വഹ

ബൈജു സുല്‍ത്താന്‍ വഹ

മിന്നാമിനുങ്ങ് വഹ

സുല്‍ വഹ

സിദ്ധാര്‍ത്ഥന്‍ വഹ

ഇതും അതുല്യേച്ചി വഹ പിന്നെ ഇതും

അഗ്രജന്‍ വഹ

ചുള്ളിക്കാല ബാബു വഹ വീഡിയോ ക്ലിപ്പ്

ഞാന്‍ കണ്ട ബ്ലോഗേര്‍സ് പിക്നിക്ക് അഥവാ ...

അഥവാ കോവാലന്‍ കൊല്ലത്തു പോയതുപോലെ. ആ കഥ എന്താണെന്നു വച്ചാല്‍, ജന്മനാ മാങ്ങൂരുകാര്‍ മണ്ടന്മാരാണത്രേ (അത്രേ വച്ചത് ഈ സ്റ്റേറ്റ്മെന്റ് ഞാന്‍ എന്‍ഡോര്‍സ് ചെന്നുന്നില്ലെന്നു മനസ്സിലാക്കി മാങ്ങൂരുകാര്‍ ആരെങ്കിലും ഇതു വായിക്കുന്നെങ്കില്‍‍ എന്നെയടിക്കാന്‍ വരാതിരിക്കാന്‍.)

പണ്ടൊരിക്കല്‍ മാങ്ങൂരു കട നടത്തുന്ന മുതലാളി അസിസ്റ്റന്റ് കോവാലനെ വിളിച്ചു പറഞ്ഞു
"ഡാ കോവാലാ, നാളെ രാവിലേ നീ കൊല്ലത്തു വരെ ഒന്നു പോകണം കേട്ടോ."
"ശരി മുതലാളീ. പോകാം"
അടുത്ത ദിവസം രാവിലേ തന്നെ മുതലാളി കൊല്ലത്തങ്ങാടീന്നു വാങ്ങിക്കാനുള്ള സാധനത്തിന്റെ ലിസ്റ്റും കാശുമായി കാത്തിരിപ്പായി. കോവാലനെ കാണാനില്ല. ഉച്ചകഴിഞ്ഞപ്പോ അവന്‍ കയറി വരുന്നു.
"നിന്നോട് ഞാന്‍ ഇന്നലേ പറഞ്ഞതല്ലേടാ രാവിലേ വരണം കൊല്ലത്തു പോകാനുണ്ടെന്ന്."
"ഞാന്‍ രാവിലേ തന്നെ കൊല്ലത്തു പോയല്ലോ. തിരിച്ചു വരണ വഴിയാ."
"പോയിട്ട്?"
"പോയിട്ട് ഞാനിങ്ങു പോന്നു. വേറൊന്നും പറഞ്ഞില്ലായിരുന്നല്ലോ"

കോവാലന്റെ കൊല്ലം ട്രിപ്പ് പോലെ ഞാനും പിക്നിക്കിനു പോയി.

അതായത്, രാവിലേ അത്യാവശ്യമായി ഒരാളെ കാണാന്‍ പോയി. ഉച്ചയായപ്പോള്‍ ദത്തനുറങ്ങി. ലവനെ വിളിച്ചെണീപ്പിച്ചാല്‍ മൂശേട്ട പിടിച്ച് അത്രയും ചളമാക്കും. അങ്ങനെ കാത്തിരിക്കുമ്പോള്‍ നാട്ടീന്നു കലേഷ് വിളിച്ചു
"ആരൊക്കെയുണ്ട് ദേവേട്ടാ അവിടെ?"
"ഞാനും വിദ്യയും ദത്തനും"
"ആരുമെത്തിയില്ലേ ഇതുവരെ?"
"ഓ മീറ്റിനോ? അവിടെ എല്ലാവരും എത്തിക്കാണും, ഞാന്‍ ഇപ്പോഴും വീട്ടിലിരിക്കുന്നതേയുള്ളു."

ദത്തനും ബിലാലും എണീറ്റപ്പോള്‍ സിദ്ധാര്‍ത്ഥന്‍ പോയി കേക്കു വാങ്ങി വന്നു. പുള്ളിയുടെ വണ്ടിയില്‍ കയറിക്കൂടി. റോഡ് ബ്ലോക്കോട് ബ്ലോക്ക്.
"ചൈക്കിള്‍" ദത്തന്‍.
"ഹ ഹാ" ബിലാല്‍.
സൈക്കിളില്‍ പോയാല്‍ ഇതിലും വേഗം എത്താം എന്നായിരിക്കും ലവന്മാര്‍ പറഞ്ഞത്. ഒരിഞ്ച് വീതം ആണ്‌ മിനുട്ടില്‍ വണ്ടികള്‍ നീങ്ങുന്നത്.

ദില്‍ബാസുരന്‍ ഫോണ്‍ ചെയ്തു. ഗേറ്റ് രണ്ടില്‍ കയറണം പോലും. എത്ര കറങ്ങിയിട്ടും ഗേറ്റ് ഒന്നു കഴിഞ്ഞാല്‍ മൂന്നേ കാണുന്നുള്ളു. പാര്‍ക്കിങ്ങ് എങ്ങുമില്ല. ഒടുക്കം റോഡിനപ്പുറത്ത് നിര്‍ത്തി ഇനി നടക്കാമെന്ന് സിദ്ധാര്‍ത്ഥന്‍.

മീറ്റ് അപ്പഴേക്ക് ഒരു പരുവം കഴിഞ്ഞിരുന്നെന്ന് അപ്പു, അനില്‍ശ്രീ തറവാടി തുടങ്ങിയവരിട്ട പടത്തില്‍ നിന്നും ഇന്ന് മനസ്സിലായി.

ഒരു തരത്തില്‍ എത്തിപ്പെട്ടു. നൂറോളം ആളു കൂടി നില്‍ക്കുന്നു.
"റ്റാ റ്റാ ." ദത്തന്‍
"മ്മാ, പൂവ്വാം?" ബിലാല്‍
ഒരഞ്ചു പേരെയൊക്കെ നേരിടാന്‍പറ്റിയേക്കും,പക്ഷേ നൂറു പേര്‍ കൂടിയാല്‍ സ്കൂട്ടാവുന്നതല്ലേ ബുദ്ധി?

ഇതുവരെ നേരിട്ടു കാണാന്‍ പറ്റിയിട്ടില്ലാത്ത മൈനാഗന്‍ മാഷെയും അപ്പുവിനെയും കണ്ടു. സിമി, ഉഗാണ്ട രണ്ടാമന്‍, കാവലാന്‍, അനില്‍ശ്രീ, ഹരിയണ്ണന്‍ തുടങ്ങി അഞ്ചാറു പേരെ പരിചയപ്പെട്ടപ്പോഴേക്ക് വട, കടല, അവില്‍ തുടങ്ങിയവ കണ്ണില്‍ പെട്ടു. പിന്നെ ഞാനൊന്നുമറിഞ്ഞില്ല. കൈപ്പള്ളി ക്ലാസ്സെടുത്തെന്നോ ഒക്കെ ഇവിടൊക്കെ വായിച്ചറിഞ്ഞു. എന്തരോ എന്തോ. ബ്ലോഗ് സൂചിക, ബ്ലോഗര്‍മാര്‍ക്കിടയിലെ വിഷൂചിക, ബൂലോഗം എന്ന മരീചിക തുടങ്ങിയവയെപ്പറ്റിയാവമ്മെന്ന് ഊഹിക്കുന്നു.

ശരിക്കും ബിലാലിന്റെ പിറന്നാളായിരുന്നു, ദത്തനൂടെ കേക്കു കട്ടണം എന്ന് സിദ്ധാര്‍ത്ഥനു വാശി. എന്നാ അങ്ങനെ തന്നെ.

തറവാടി വല്യമ്മായിമാരുടെ വാവ, നിതിന്‍ വാവ എന്നിവരെയും കണ്ടു. ഒരുപാടു കാലത്തിനു ശേഷം മീറ്റിനു വന്ന ഇത്തിരിവെട്ടം, സമീഹ തുടങ്ങിയരെയും കിട്ടി. അപ്പുവിട്ട പടം കണ്ടപ്പോള്‍ ഞാന്‍ പച്ചാനയാണെന്നു കരുതിയത് ഷാരുവായിരുന്നെന്ന് മനസ്സിലായി.

അതുല്യാമ്മ അടുത്ത രണ്ടുവര്‍ഷം യൂയേയി മീറ്റിനുണ്ടാവില്ലത്രേ. അതെന്തരായാലും ശര്‍മ്മാജി കൃത്യമായി എത്തണം, കുട്ടികളൊത്തു കളിക്കണം. ഇതുവരെ നടന്ന സകല ബ്ലോഗേര്‍സ് കൂടിക്കാഴ്ച്ചയിലും മുടങ്ങാതെ നടന്ന ഈ ഐറ്റം ഇല്ലെങ്കില്‍ എന്തരോ കുറവുപോലെപോലെ തോന്നും.

കുറുമാന്റെ തല കണ്ട് തലകറങ്ങി ഒരിടത്തിരിക്കുമ്പഴേക്ക് ദത്തന്‍ വന്നു മേലേക്കു ചൂണ്ടി "സാര്‍"- എന്നുവച്ചാല്‍ സ്റ്റാറൊക്കെ ഉദിച്ചു ഇനിയെങ്കിലും വീട്ടില്‍ പോകാം എന്ന്.

അങ്ങനെ ഞങ്ങളിങ്ങു പോന്നു.
ഇത്രയും പേരെ വിളിച്ചു കൂട്ടി പരിപാടി നടത്തിയ അഗ്രജനും ശാപ്പാട് കൊണ്ടുവന്ന എല്ലാവര്‍ക്കും നന്ദി.

Saturday, March 15, 2008

ബ്ലോഗേര്‍സ് മീറ്റ് (യു.എ.ഇ.) 2008

മിനിമം മൂന്ന് പോസ്റ്റെങ്കിലും ഇട്ടാലേ ബ്ലോഗേര്‍സ് മീറ്റ് നടത്തൂ എന്നത് ഞങ്ങള്‍ യു.എ.ഇ.ക്കാരുടെ ഒരു ചെറിയ നിര്‍ബ്ബന്ധാ… :)

ദേ… യു.എ.ഇ. ബ്ലോഗേര്‍സ് മീറ്റ് 2008 - മൂന്നാമത്തെ പോസ്റ്റ്!

21 മാര്‍ച്ച് ദുഃഖവെള്ളിയാഴ്ചയായിരിക്കും എന്നതിനാല്‍ മാര്‍ച്ച് 28-ആം തിയ്യതിയിലേക്ക് പരിപാടി നിശ്ചയിക്കാം എന്ന് കരുതുന്നു...

അപ്പോ അതങ്ങട്ട് ഒറപ്പിക്കല്ലേ...?

സ്ഥലം മുമ്പ് നമ്മള്‍ പറഞ്ഞപ്രകാരം ദുബായിലെ മുശ്രിഫ് പാര്‍ക്ക് തന്നെ.

എല്ലാവരും അഭിപ്രായങ്ങളും നിര്‍ദ്ദേശങ്ങളും അറിയിക്കുക. ഇനി ബാക്കിയുള്ളത് 13 ദിവസങ്ങള്‍ മാത്രം!

മുന്‍പിട്ട രണ്ട് പോസ്റ്റുകളിലൂടെ മീറ്റില്‍ പങ്കെടുക്കാന്‍ താത്പര്യവും സന്നദ്ധതയും അറിയിച്ചവര്‍:-
01- അതുല്യ
02- കൈതമുള്ള്
03- അപ്പു
04- കുറുമാന്‍
05- ശിവപ്രസാദ്/ മൈനാഗന്‍
06- ദില്‍ബാസുരന്‍
07- ഇത്തിരിവെട്ടം
08- അഭിലാഷങ്ങള്‍
09- മുസാഫിര്‍
10- സുല്‍
11- ആഗ്നേയ
12- ബഷീര്‍ വെള്ളറക്കാട്
13- സിമി
14- പൊതുവാള്‍
15- കൈപ്പള്ളി
16- ദേവന്‍
17- ഷാരു
18- കണ്ണൂസ്
19- കുറ്റ്യാടിക്കാരന്‍
20- നജൂസ്
21- മുസിരിസ്/ അജിത്ത് പോളക്കുളത്ത്
22- രാധേയന്‍
23- ഉഗാണ്ട രണ്ടാമന്‍
24- ഇളംതെന്നല്‍
25- ചുള്ളിക്കാല ബാബു
26- തമനു
27- വിശാലമന‍സ്കന്‍‍
28- കരീം മാഷ്
29- സാക്ഷി
30- പട്ടേരി
31- തറവാടി
32- വല്യമ്മായി
33- സുഹൈര്‍
34- അഗ്രജന്‍

പുതുതായി ഹാജര്‍ വെച്ചവര്‍:-
35- സമീഹ
36- കാവലാന്‍
37- രാജീവ് ചേലനാട്ട്
38- ഷഫീര്‍
39- ബൈജു സുല്‍ത്താന്‍
40- അനില്‍ശ്രീ
41- നിതിന്‍ വാവ
42- സാല്‍ജോ
43- അനില്‍ ഫുജൈറ
44- സിദ്ധാര്‍ത്ഥന്‍
45- വഴിപോക്കന്‍
46- സങ്കുചിതമനസ്കന്‍
47- ഹരിയണ്ണന്‍
48- കനല്‍
49- ചന്ദ്രകാന്തം
50- ഷംസ്
51- പച്ചാന
52- മിന്നാമിനുങ്ങ്
53- ഭടന്‍

=================

പലരുടേയും അഭിപ്രായങ്ങള്‍ മാനിച്ച് നമ്മള്‍ ചില മാറ്റങ്ങള്‍ വരുത്തിയിട്ടുണ്ട്.

ദിവസം: 28 മാര്‍ച്ച് വെള്ളിയാഴ്ച
വേദി: ക്രീക്ക് പാര്‍ക്ക് - ദുബായ്
സമയം: ഉച്ചയ്ക്ക് ശേഷം 3 മണി മുതല്‍ വൈകീട്ട് 7 മണി വരെ.
ഭക്ഷണം: ലഘുഭക്ഷണം
പാര്‍ക്ക് പ്രവേശന നിരക്ക്: തല ഒന്നുക്ക് 5 ദിര്‍ഹം

ആരെങ്കിലും എന്തെങ്കിലുമൊക്കെ ഭക്ഷണങ്ങള്‍ കൊണ്ട് വരികയാണെങ്കില്‍ സസന്തോഷം സ്വാഗതം :)

Friday, March 07, 2008

എന്നാണപ്പാ ഈ ബാര്‍ബര്‍ ക്യൂ ?

നമ്മളെല്ലാം കൂടാന്‍ പോണെന്നും അത്‌ മംസാര്‍ പാര്‍ക്കിലോ സാബീലിലോ മറ്റോ ആണെന്നും അവിടെ ഒട്ടരു സ്റ്റൈലില്‍ കൊള്ളിയില്‍ പ്രാവിറച്ചി കുത്തി വറുക്കാന്‍ പോണെന്നും വായിച്ചിരുന്നു. അത്‌ മാര്‍ച്ച്‌ ഇരുപത്തൊന്നിനാണെന്ന് ആദ്യം തീരുമാനിച്ചെന്നും ആ ദിവസം ദുഖ വെള്ളിയാഴ്ച്ച ആയതിനാല്‍ നീട്ടിവച്ചെന്നും പിന്നീടറിഞ്ഞ്‌. പുതിയ തീയതി തീരുമാനിച്ചോ? എന്നാ? എപ്പഴാ? എവിടെ വച്ചാ? പച്ചവെള്ളത്തില്‍ കുളിക്കാമോ? പഴങ്കഞ്ഞി കുടിച്ചാല്‍ മൂര്‍ച്ഛിക്കുമോ?

Wednesday, February 13, 2008

ഒന്നു മീറ്റാം... ഒരിക്കല്‍ കൂടി... (യു.എ.ഇ. ബ്ലോഗ് മീറ്റ് 2008)

ഇടയ്ക്കൊക്കെ ബ്ലോഗര്‍മാര്‍ ഒന്നിച്ച് കൂടുന്നതും പരസ്പരം പരിചയപ്പെടുന്നതും ഉള്ള സൌഹൃദങ്ങള്‍ പുതുക്കുന്നതും ഒന്നിച്ചിരുന്ന് എന്തെങ്കിലുമൊക്കെ സംസാരിക്കുന്നതും അതോടൊപ്പം വല്ലതും കൊറിക്കുന്നതുമൊക്കെ ചെയ്യുന്നത് കൊണ്ടോ, അല്ലെങ്കില്‍ അതിന്‍റെയൊക്കെ പടമെടുത്ത് ബ്ലോഗില്‍ ഇടുന്നത് കൊണ്ടോ ബ്ലോഗിന്‍റെ ഉത്തരം ഇടിഞ്ഞ് വീഴില്ല എന്ന് വിശ്വസിക്കുന്ന പ്രിയ യു.എ.ഇ. ബ്ലോഗര്‍മാരെ (ഒന്ന് ശ്വാസം ആഞ്ഞ് വലിച്ചോട്ടെ...),

കൊടും തണുപ്പിന് ശക്തി കുറഞ്ഞ് തുടങ്ങി പകരം ഇളം തണുപ്പ് കടന്ന് വന്നിരിക്കുന്നു. തണുപ്പ് വിട്ടൊഴിയുന്നതിന് മുമ്പ് ഒരു ബ്ലോഗ് മീറ്റ് നടത്താമല്ലേ... കുറച്ച് കാലമായല്ലോ ഒന്നിച്ച് കൂടിയിട്ട്. മത്രമല്ല, ഒത്തിരി പുതിയ ബ്ലോഗര്‍മാര്‍ യു.എ.ഇ. യില്‍ നിന്നും ഇപ്പോള്‍ ബ്ലോഗെഴുതുന്നുണ്ട്... എല്ലാവര്‍ക്കും പരസ്പരം പരിചയപ്പെടാനും സൌഹൃദങ്ങള്‍ സ്ഥാപിക്കാനും ഒരവസരം.

മാര്‍ച്ച് മാസത്തില്‍ പൊതുവെ നല്ല കാലാവസ്ഥയായിരിക്കും എന്ന് കരുതുന്നു... ഒരു ഓപ്പണെയര്‍ മീറ്റിനെ പറ്റി ചിന്തിക്കാവുന്നതാണ്.

ദുബായിലെ അതിവിശാലമായ മുശിരിഫ് പാര്‍ക്കില്‍ കൂടുകയാണെങ്കില്‍ പലവിധ സൌകര്യങ്ങളുമുണ്ട്. മുന്‍ കൂട്ടിയുള്ള ബുക്കിങ്ങിന്‍റേയോ മിനിമം ഇത്ര പേര്‍ വേണമെന്നതിന്‍റേയോ ആവശ്യമില്ല. വണ്ടിയൊന്നുക്ക് പത്ത് ദിര്‍ഹം മാത്രമാണ് എണ്ട്രന്‍സ് ഫീ.

കൂടുതല്‍ പേര്‍ക്കും സൌകര്യപ്രദമായി തോന്നുന്ന ഒരു വെള്ളിയാഴച തീരുമാനിച്ചാല്‍ മതി. രാവിലെ ഒരു പത്ത് മണിയോട് കൂടെ ആരംഭിച്ച് വൈകീട്ട് നാല് മണിക്കോ അഞ്ച് മണിക്കോ പിരിയാവുന്ന വിധത്തില്‍ ഒരു മുഴുനീള മീറ്റ്. പള്ളിയില്‍ പോകേണ്ടവര്‍ക്ക്, പള്ളി പാര്‍ക്കിനകത്ത് തന്നെയുണ്ട്.

വിശാലമായ പ്ലേ ഏരിയ ഉള്ളത് കൊണ്ട് കുഞ്ഞുങ്ങള്‍ക്കും ഇഷ്ടമാവും.

ഭക്ഷണം... എല്ലാവരും എന്തെങ്കിലുമൊക്കെ ഉണ്ടാക്കി കൊണ്ടുവന്ന് പരസ്പരം ഷെയര്‍ ചെയ്യുകയോ, കാറ്ററിംഗ് സര്‍വ്വീസിന് ഓര്‍ഡര്‍ കൊടുക്കുകയോ അതുമല്ലെങ്കില്‍ ബാര്‍ബിക്യൂ ആവുകയോ ചെയ്യാവുന്നതാണ്.

മുകളിലെഴുതിയവയൊന്നും തന്നെ തീരുമാനങ്ങളല്ല... വെറും അഭിപ്രായങ്ങള്‍!
ചര്‍ച്ച ചെയ്ത് ചെയ്ത് സമയം പാഴാവാതിരിക്കാന്‍ ഒരു നിര്‍ദ്ദേശം വെച്ചെന്ന് മാത്രം.

എല്ലാവരും ഒന്നുത്സാഹിക്കൂ... അഭിപ്രായങ്ങള്‍ അറിയിക്കൂ!
നമുക്ക് വേണ്ടത് ഔപചാരികതയൊന്നും കടന്നു വരാത്ത ഒരു കൂടിച്ചേരല്‍!